Младиот фудбалер Зани Назифи кариерата ќе ја продолжи во странство, односно во дресот на Лапи од Косово.
21-годишниот фудбалер во пролетниот дел од минатата сезона настапуваше за Шкендија Арачиново и успеа со овој тим да избори историски влез во Прва лига, а во есенскиот дел на минатата сезона настапуваше за Шкупи.
Назифи кој игра како крилен напаѓач кариера ја започна во прилепска Победа, потоа беше дел од Њу Старс и Шкендија Арачиново, заигра и за екс прволигашот Беса од Добри Дол.
Левото крило стави потпис со Лапи до летото 2029 година, со што својата иднина ја врзува за клубот во наредните три години.
„Со своите квалитети во офанзивниот дел од играта, брзината и способноста да создава и реализира акции, се очекува Назифи да биде значајно засилување за нашиот тим во наредните сезони. Назифи му се приклучува на Лапи како дел од клупскиот проект за следните сезони, додавајќи квалитет и дополнителни опции во офанзивната линија на тимот“, велат од косовскиот клуб.
За Назифи ова ќе биде прв интернационален трансфер.
