Ракометниот клуб Еурофарм Пелистер продолжува да инвестира во младите таленти, а најново засилување на битолскиот клуб е перспективниот хрватски ракометар Диего Басанесе.
Станува збор за 18-годишен десен бек, кој е член на кадетската и младинската репрезентација на Хрватска и важи за еден од најталентираните играчи од својата генерација. Басанесе во Битола пристигнува со одлични препораки од хрватската ракометна јавност, а со Еурофарм Пелистер потпиша четиригодишен договор.
Младиот Хрват пред трансферот во Македонија успешно настапуваше за екипата на Умаг, каде ги покажа своите квалитети и го привлече вниманието на повеќе клубови. Дополнителна потврда за неговиот потенцијал е и настапот за кадетската репрезентација на Хрватска, со која освои медал на Медитеранските игри.
Во Еурофарм Пелистер веруваат дека Басанесе претставува инвестиција за иднината и дека во наредните години ќе биде значаен дел од проектот на клубот.
Хрватскиот интернационалец официјално ќе биде претставен на почетокот на подготовките за сезоната 2026/27, кога ќе им се приклучи на своите нови соиграчи во Битола.
