Младиот македонски тенисер Андреј Темов го освои трофејот на турнирот Битола Опен за тенисери до 14 години, кој се играше во категорија 3. Во финалниот натпревар Темов беше подобар од Ленарт Кадриу, совладувајќи го со 2-0 во сетови (6:4, 7:6(4)).
Иако финалето го доби без загубен сет, патот до титулата беше значително потежок. Во полуфиналето Темов по голема борба го елиминираше Димитрис Николау со 2-1 во сетови (4:6, 6:3, 6:2), додека во четвртфиналето беше поуспешен од Ставрис Ладерос со 2-1 (6:3, 5:7, 6:2).
Во првите две кола македонскиот тенисер беше особено убедлив. Прво го совлада Топрак Албајрак со 2-0 во сетови без да загуби ниту еден гем, а потоа го победи и Виктор Дамјанов со 2-0 во сетови, препуштајќи му само еден гем.
Во конкуренција на двојки, Темов настапи заедно со Василиј Закоски. Македонскиот тандем беше запрен во полуфиналето од подоцнежните шампиони Сами Дамани и Леви Де Вахтер.
По одличниот настап во Битола, Темов оваа недела настапува на турнирот МТП Опен во Скопје, каде што е поставен за прв носител. На турнирот ќе учествуваат и повеќе млади македонски тенисери и тенисерки.
