Утре ракометниот клуб Младост 1977 од Богданци ќе го игра најважниот натпревар во сезоната. Тимот од Богданци во бараж дуелот за пласман во Супер лигата ќе се соочи со Струга, екипа која се бори за опстанок во македонската ракометна елита.
Натпреварот ќе се одигра во спортската сала „Антон Димитров“ во Бутел – Скопје, со почеток од 19:00 часот, а влогот е огромен – место во Супер лигата за сезоната 2026/27.
Младост зад себе има одлична сезона во Првата лига, која ја заврши на второто место и заслужено доби шанса преку баражот да се избори за враќање меѓу најдобрите македонски ракометни клубови. Од другата страна ќе биде Струга, која сезоната ја заврши на претпоследната позиција во Супер лигата и ќе се обиде да го зачува елитниот статус.
Во Богданци владее вистинска ракометна еуфорија. Не само градот, туку целиот Југоисточен регион е обединет околу Младост. Поддршка за клубот пристигнува од Дојран, Валандово, Гевгелија, Стојаково и останатите места од регионот, а голем број навивачи со организиран превоз ќе заминат кон Скопје.
Се очекува вистинска „окупација“ на трибините во Бутел, каде сино-белата армија ќе биде дополнителен ветер во грб за своите миленици. Навивачите уште еднаш покажуваат дека стојат рамо до рамо со клубот во најважните моменти, а утрешниот натпревар е токму таков – меч на сезоната.
Младост во текот на целата сезона покажа карактер, квалитет и шампионски менталитет. Сега останува уште последниот чекор. Само 60 минути го делат тимот од Богданци од остварување на големата цел и враќање во Супер лигата.
Утре во Бутел нема да игра само Младост. Утре ќе игра целиот Југоисток. Сите во сино-бело, сите со една цел – Супер лигата повторно да се врати во Богданци!
