Иако има само 17 години, Меланија Грозданова веќе е едно од најпрепознатливите имиња во македонскиот женски фудбал. Репрезентативката на Македонија и фудбалерка на Љуботен зад себе има уште една успешна сезона во која постигна 17 погодоци во Првата македонска женска фудбалска лига и повторно го привлече вниманието на фудбалската јавност.
Грозданова веќе подолг период е препознаена како една од најголемите надежи на македонскиот женски фудбал. Во изминатите месеци нејзиното име беше поврзувано со интерес од повеќе европски клубови, а настапите за клубот и репрезентацијата дополнително го потврдија нејзиниот потенцијал.
Во разговор за Спортска Мрежа, младата фудбалерка зборуваше за сезоната зад неа, головите, плановите за иднината, своите почетоци, идолите и репрезентативните предизвици кои следуваат.
За сезоната зад неа:
„Сезоната за мене беше добра, имаше добри натпревари, за жал не успеавме со клубот да ја одбраниме титулата, сметам дека нивото на лигата е на повисоко ниво…“
За головите и личниот учинок:
„Морам да признаам дека можам уште повеќе голови да постигнам од овие кои ги имам постигнато, но мојот приоритет не е да постигнам повеќе голови, сакам колективна игра и несебичност, во тоа сум сигурна дека имам голем придонес и во останатите голови кои ги постигнаа моите соиграчки, секако головите ми се драги и се чувствувам супер што сум во топ 5 стрелци…“
За иднината и интересот од Европа:
„Плановите за следната сезона сѐ уште е рано да ги кажам, мојот менаџер Дарко Мариќ од D.M. Management неуморно контактира со повеќе европски клубови, според неговите информации точно е дека има голем интерес за мене, но полнолетството е голема пречка за „прерана“ преселба во Европа… Но јас на 27.12.2026 веќе ќе станам полнолетна.“
За љубовта кон фудбалот:
„Фудбалот за мене беше единствен спорт од најмала возраст, одлучна бев од мали години да станам фудбалерка, тоа беше мојата единствена желба и денеска уживам во улогата фудбалерка…“
За идолите и најдрагите моменти:
„Мојот идол е Кристијано Роналдо, тој е мојата инспирација и водилка на кој се огледувам ден денес, фудбалски клуб Реал Мадрид, имам повеќе драги победи со репрезентацијата… Погодоци истотака, но можам да го одвојам мојот прв погодок против Андора во квалификациите… Еден од најзначајните ми е израмнувачкиот погодок против Словенија со У19 за пласман во елитна фаза…“
За репрезентацијата:
„Мојот фокус по завршувањето на сезоната е репрезентативните квалификации кои следуваат, целта ни е подобар успех во квалификации… Да се претставиме во најдобро светло во дресот на Македонија.“
По завршувањето на клупските обврски, целосното внимание на една од најперспективните македонски фудбалерки е насочено кон настапите со националниот тим. Грозданова и нејзините соиграчки ќе се обидат да остварат подобри резултати во претстојните квалификации и достоинствено да ја претставуваат Македонија на меѓународната сцена.
Со само 17 години, 17 првенствени погодоци, статус на стандардна репрезентативка и интерес од европски клубови како Јувентус и Атлетико Мадрид, Меланија Грозданова продолжува да го гради својот пат кон големата фудбалска сцена. Македонскиот женски фудбал во неа гледа лидер на новата генерација, а нејзините најдобри денови, без сомнение, допрва доаѓаат.
