Салата „Билјанини Извори“ вечерва ќе биде исполнета до последното место, а атмосферата одамна ја надмина рамката на обичен натпревар – Охрид живее ракометна европска приказна што може да заврши со историски трофеј.
Пред ГРК Охрид стои најголемиот испит досега – реванш финалето од ЕХФ Европскиот Куп против унгарска Татабања, дуел во кој секоја секунда може да ја смени историјата на клубот.
Охриѓани влегуваат со предност од првиот меч, откако во Унгарија славеа минимално со 29-28, победа која отвори врата кон сонот што сега е на дофат.
Патот до ова финале беше сè освен лесен – се редеа победи над неколку квалитетни ракометни имиња: азербејџански Баку, босанска Слога Добој, чешка Дукла Прага, грчки Олимпијакос и словенечки Целје. Секоја рунда носеше нов предизвик, а тимот на Борис Ројевиќ растеше со секој чекор.
Со биланс од 11 натпревари, 10 победи и само еден минимален пораз, Охрид вечерва има шанса да ја заокружи најголемата приказна во својата историја – европски трофеј пред домашната публика.
Натпреварот започнува во 20:00 часот, а „Билјанини Извори“ одамна е распродадена – вечерва градот дише за една цел: Охрид да го крене пехарот.
