Шампионот на Трета лига – Север, Еуромилк ГЛ, успеа да се врати во Втората македонска фудбалска лига, откако во бараж-натпреварот во Кратово славеше со 2:1 против второлигашот Каменица Саса.
Популарните „лисици“ од Горно Лисиче, кои во минатото настапуваа и во Првата македонска фудбалска лига, од следната сезона повторно ќе бидат дел од второлигашката конкуренција.
Еден од хероите на големиот успех е искусниот голгетер Орхан Мифтар, кој во 89. минута го постигна победничкиот погодок и практично го реши натпреварот во регуларниот дел, носејќи огромна радост кај фудбалерите, стручниот штаб и навивачите на Еуромилк ГЛ.
Во изјава за Спортска Мрежа, Мифтар откри дека уште од самиот почеток на сезоната целта била јасна – враќање на клубот во Втората лига. Тој истакна и дека во финишот од сезоната настапувал со сериозна повреда, но желбата за успех била посилна од сите проблеми.
„Уште од самиот почеток на сезоната нашата цел беше да обезбедиме влез во Втора лига со Еуромилк. Имавме тешка сезона, иако на крај бодовната разлика е голема, сепак имаше тешки натпревари, но и натпревари кои лесно ги добивавме. Првата цел да бидеме шампион во Трета лига – Север ја обезбедивме, но јас на три кола пред крајот скинав лигамент на долниот зглоб, иако требаше да паузирам три месеци, сепак по три недела се вратив на терените за да го дадам мојот максимум и да помогнам екипата да ја оствари целта. Во денешниот бараж натпревар оставив срце на терен, успеав да постигнам и гол и заедно како целина да ја оствариме целта – Еуромилк влезе во Втора лига. Овој успех е заеднички на сите фудбалери, стручниот штаб и управата на клубот“, изјави Орхан Мифтар за Спортска Мрежа.
Со овој успех, Еуромилк ГЛ го комплетираше враќањето меѓу второлигашите, додека Каменица Саса по поразот во баражот се сели во Трета лига – Исток за следната сезона.
