Екипата на Влазними Јуниор од Пресил е нов освојувач на Купот на ОФС Прилеп, откако во едно неверојатно и драматично финале славеше над Братство 07 од Житоше по изведување на пенали.
Регуларниот дел донесе вистинска голеада и дури десет погодоци, а натпреварот заврши без победник со резултат 5:5. По големата борба и неизвесноста во текот на сите 90 минути, победникот мораше да биде решен преку пенал рулетот.
Во серијата пенали повеќе присебност и концентрација покажаа фудбалерите на Влазними Јуниор, кои триумфираа со 6:5 и сосема заслужено се радуваа на шампионскиот пехар. За тимот од Житоше, кој во минатото беше и второлигаш, пеналите се покажаа како кобни во борбата за трофејот.
Пехарот на победничката екипа го додели Комесарот за натпревари при Општинскиот фудбалски сојуз Прилеп, Љубе Ристевски.
Правдата на финалниот натпревар ја делеше Иле Мишески, а негови асистенти беа Димитар Здравески и Филип Боцески, додека делегат на средбата беше Љубе Ристевски.
Финалниот натпревар помина во фер и коректна атмосфера, а уште еднаш беше потврдено дека ОФС Прилеп претставува одлично организиран фудбалски сојуз, кој успешно ги организира натпреварувањата во Општинската лига, односно Четвртата и Петтата лига, како и Купот на ОФС Прилеп.
