Фудбалерот на Осогово, Филип Димоски, зад себе има импресивна сезона во Втората македонска фудбалска лига, потврдувајќи дека е еден од најдобрите напаѓачи во второлигашката конкуренција.
26-годишниот голгетер сезоната ја заврши со вкупно 16 постигнати погодоци, од кои три во есенскиот дел во дресот на Победа од Прилеп, додека дури 13 голови постигна во пролетниот дел како фудбалер на Осогово, откако зимава направи трансфер во кочанскиот клуб.
Димоски беше еден од клучните играчи во редовите на популарните „жетвари“, а во повеќе наврати сам решаваше натпревари и носеше важни бодови за својот тим. Во дресот на Осогово оваа сезона запиша и два хет-трика, што е уште една потврда за неговата голема голгетерска форма.
Одличните партии му донесоа место во топ четири зоната на листата на најдобри стрелци во Втората лига, а ова воедно е и најдобрата сезона во кариерата на искусниот офанзивец.
Осогово сезоната ја заврши на високото шесто место на табелата, а токму Димоски беше еден од најзаслужните за успешната сезона на тимот од Кочани.
Во текот на својата кариера, покрај за Осогово и Победа, настапуваше и за Охрид, Детонит Плачковица, Каменица Саса, Питу Гули, Вардар Неготино и 11-ти Октомври, клубот каде ги направи своите први фудбалски чекори.
Со сезоната која ја има зад себе, Филип Димоски уште еднаш покажа дека станува збор за напаѓач кој знае како се решаваат натпревари и како се тресе противничката мрежа.
