Македонската машка сениорска одбојкарска репрезентација од утринава е во Подгорица, каде утре и во петок во комплексот „Верде“ ќе ги одигра последните контролни натпревари против Црна Гора пред стартот на Европската лига 2026.
Избраниците на селекторот Јошко Миленкоски веќе се сместени во главниот град на Црна Гора, а денеска ќе одработат и тренинг во салата каде ќе се играат натпреварите.
На располагање на стручниот штаб се 16 одбојкари. Во составот се техничарите Ѓорѓи Ѓоргиев, Давид Стојанов и Лука Ристоски, коректорите Никола Ѓоргиев и Кристијан Илијев, примачите Владо Милев, Александар Љафтов, Лука Костиќ, Стојан Илиев и Тоше Ефремов, средните блокери Филип Маџунков, Филип Савовски и Митко Спасов, како и либерата Костадин Ричлиев, Ване Арапов и Филип Јованов.
Првиот пријателски натпревар против Црна Гора е закажан за утре од 17:30 часот во комплексот „Верде“ во Подгорица, а двомечот ќе биде последна проверка на формата пред настапот во Европската лига 2026.
