Градоначалникот на Општина Струмица, Петар Јанков, во својот кабинет ги прими фудбалерките и стручниот штаб на Тиверија Брера, по големиот успех и освојувањето на Купот на Македонија.
Струмичанки блеснаа во големото финале и со убедлива победа од 5:0 против Каменица Саса стигнаа до втората Куп титула во клупската историја, потврдувајќи дека оваа генерација е една од најуспешните во женскиот фудбал во Македонија.
Градоначалникот Јанков упати честитки до фудбалерките и стручниот штаб за историскиот успех и одличните настапи во текот на целата сезона.
„Честитки до фудбалерките и до стручниот штаб за големиот успех и заслужената победа во финалето над екипата на ЖФК Каменица Саса со резултат 5:0. Горди сме на нашите фудбалерки кои по втор пат во својата историја го освоија Куп трофејот! Како општина остануваме посветени на подобрување на спортската инфраструктура која е базичен услов за развој на спортистите и постигнување успеси во иднина“, рече градоначалникот Јанков.
Тиверија Брера зад себе има одлична сезона, а покрај освоениот Куп трофеј, струмичанки шампионатот во Првата женска фудбалска лига ќе го завршат и на второто место, односно како вицешампион на Македонија.
