Екипата на Победа Валандово стигна до триумф од 1:3 на гостувањето кај екипата на Карбинци во рамки на претпоследното коло на Трета лига – Исток, а притоа поразот на Овче Поле од Хоризонт Турново, значи дека „калинкарите“ на едно коло до крајот се шампиони во Трета лига – Исток и ќе играат бараж за Втора лига.
Само пет минути требаше за тимот од Валандово да има двојна предност против Карбинци преку Филип Зајков и Никола Костадинов, а веќе во 19. минута Костадинов погоди по вторпат за 0:3 на полувреме. Во вториот дел Карбинци постигна гол за ублажување на поразот на конечни 1:3 во 59. минута.
Екс вицешампионот на Македонија, Хоризонт Турново со 2:0 славеше над Овче Поле преку двата погодоци на искусниот Дејан Блажевски со што сите беа решени околу шампионот – Овче Поле ја загуби битката за титулата токму со овој пораз.
Во Струмица немаше победник откако Тиверија и Ударник ремизираа играјќи 3:3. За домашниот тим погоди Мите Благоевски, а Иван Лазаров беше двоен стрелец. За гостинската екипа стрелаа Спасиќ, Ѓеоргиев и Грбашлиев.
Победа Валандово е на врвот со 44 бодови, а Овче Поле е втор со 40 бодови.
