Вечерва од 19:00 часот во „Татран Арена“ во Прешов, машка ракометна репрезентација на Словачка и нашата машка ракометна репрезентација ќе го одиграат првиот натпревар од баражот за пласман на Светското првенство во Германија наредната година.
Македонската селекција во овој двомеч влегува со фаворитска улога, со јасна цел – освојување на место на уште едно големо натпреварување. За избраниците на Кирил Лазаров ова е шанса да се приближат кон осмото последователно СП, односно десетто во историјата.
Селекторот Кирил Лазаров за овој дуел реши да не смета на голманот Васил Гогов, средниот бек Мартин Ивановски, десниот бек Филип Николов и пивотот Марко Стојковиќ, кои останаа надвор од комбинација за првиот меч.
Од друга страна, Словачка преку баражот успеа да ја елиминира Украина и покажа дека е сериозен противник кој не смее да се потцени, иако искуството и континуитетот се на страната на Македонија во овој двомеч.
