В недела Вардар на Националната арена „Тодор Проески“ во Скопје ќе се соочи со Тиквеш, во рамки на 17. коло, кое е претпоследно есенско коло.
Навивачката група „Комити“ се одлучија на реакција и донесе одлука, секој кој ќе носи македонско знаме на натпреварот ќе има бесплатен влез. Ова е уште една причина со која ќе се наполни стадионот.
„Не е време за седење дома, време е за акција. Во недела, масовно низ скопските улици, а потоа и на стадионот. Упатуваме апел за носење на државното знаме на Македонија, како и за масовно присуство на кортеото и во копот“, се вели во соопштението на „Комити“.
Натпреварот е важен за Вардар, победата му е потребна за излез од опасната зона и прогресирање кон средината од табелата во безбедниот дел кој гарантиран директен опстанок. Тиквеш ќе има тешко гостување во Скопје, бидејќи и тој е во ситуација кога се бори за бодови со цел да го напушти днот на табелата во Првата лига.
Натпреварот стартува во 13 часот, а како што веќе информираше Спортска Мрежа главен судија на истиот ќе биде Игор Иванов од Велес.
