Нова финална драма во Скопје: Бадел 1862 ќе брка „мајсторка“, Крива Паланка нова шанса за историска титула

Дека изненадувањата се можни и во финалните пресметки за титулата, потврдија кошаркарките на Бадел 1862, кои во третиот натпревар од серијата одиграа над сите очекувања и успеаја да ја совладаат фаворизираната Крива Паланка.

Младиот состав предводен од тренерот Дарко Димитријевиќ ги надмина сите проблеми и покажа голем карактер против тимот кој беше првопласиран во регуларниот дел од сезоната и кој во Скопје пристигна со убедлива предност од 2-0 во серијата.

И покрај отсуството на Николов и Петрушевска, две важни кошаркарки од стартната петорка, „баделки“ успеаја да слават, да намалат на 1-2 и со значително поголема самодоверба да го дочекаат следниот финален натпревар.

Целта на домашниот состав е јасна – продолжување на серијата и изборување „мајсторка“ која би го дала шампионот.

Сепак, голем предизвик за Бадел 1862 ќе биде и физичката потрошувачка, со оглед на тоа што Фримен, Клири и Чолакоска на претходниот меч минаа комплетни 40 минути на паркетот. Но кога се игра финале и се води битка за титула, заморот често паѓа во втор план.

Од другата страна, Крива Паланка го доживеа првиот пораз во серијата, но сигурно е дека стручниот штаб предводен од тренерот Виктор Петровски веќе ги анализирал слабостите од претходниот натпревар.

Крива Паланка во недела ќе ја има втората „меч-топка“ за освојување на првата шампионска титула во клупската историја и ќе се обиде уште во Скопје да ја затвори серијата, без потреба од петти решавачки натпревар во салата „Бранители 2001“.

Сè е подготвено за уште една финална пресметка исполнета со неизвесност, емоции и голема борба за шампионскиот трофеј.