Суперлигашката трка за титулата влегува во самата завршница, а вечерва во Скопје ќе се одигра можеби и клучниот натпревар во сезоната. Имено, во рамки на последниот меч од 7. коло во плеј-офот, Вардар 1961 во СЦ „Јане Сандански“ од 19:00 часот ќе го пречека актуелниот шампион Еурофарм Пелистер.
Скопскиот тим има одлична можност по пауза од три години повторно да се искачи на врвот на македонскиот ракомет. На „црвено-црните“ им одговара победа, реми, но и минимален пораз до два гола разлика, со оглед дека во досегашните меѓусебни пресметки имаат две победи и подобра гол-разлика од битолчани.
Од друга страна, Еурофарм Пелистер доаѓа во главниот град со јасна цел – да ја продолжи битката за титулата и да не дозволи Вардар уште вечерва да ја прослави шампионската круна. За битолчани бодовите се важни и во трката со Охрид за позицијата веднаш зад лидерот на табелата.
До крајот на сезоната остануваат уште четири кола, но вечерашниот дуел може да донесе голем пресврт во шампионската битка и да го одреди патот на титулата.
