Ракометарите на Охрид остварија исклучително важен триумф на гостувањето кај Алкалоид, славејќи со 27-26 и правејќи голем чекор кон задржување на втората позиција во Супер лигата. Само неколку дена по историскиот успех и пласманот во финалето на ЕХФ Европскиот Куп, „гладијаторите“ покажаа дека знаат како да се носат и со домашните предизвици.
И покрај заморот и кусиот период за подготовка, охриѓани одиграа натпревар со осцилации, но со силен карактер и борбеност успеаја да ги надминат проблемите и да стигнат до посакуваните бодови. Тактичките грешки не изостанаа, но беа надоместени со храброст и решителност во клучните моменти.
Шпанецот во редовите на Охрид, Реј Моралес, во изјава за Спортска Мрежа, истакна дека натпреварот бил исклучително тежок, особено по големиот европски успех неколку дена претходно. Тој потенцира дека тимот бил уморен и можеби недоволно подготвен, но наместо тоа да биде изговор, го искористиле како дополнителна мотивација за да стигнат до победата.
„Ова беше многу тежок натпревар за нас. Само три дена по најголемиот успех во историјата на нашиот клуб, имавме меч на кој повторно можевме да го издигнеме клубот на уште повисоко ниво. Бевме уморни и можеби недоволно подготвени, но наместо тоа да го користиме како изговор, го претворивме во дополнителна мотивација. Имавме многу тактички грешки, но ги надминавме со храброст. Мислам дека тоа е најдобриот опис на натпреварот.“- изјави Моралес за Спортска Мрежа.
Со оваа победа, Охрид уште еднаш покажа дека покрај квалитетот, поседува и ментална цврстина – нешто што може да биде пресудно во финишот од сезоната, како на домашната, така и на европската сцена.
