Заврши есенската полусезона во Првата женска фудбалска лига со одигра 14 кола, а есенски шампион во фудбалската елита на Македонија во женска конкуренција е екипата на Тиверија Брера од Струмица. Следува зимска пауза, а пролетниот дел ќе започне со натпреварите од 15. коло.
Денес се одиграа натпреварите од вонредното 14. коло на Првата женска фудбалска лига, коло кое беше одигирано според очекуваното без изненадувања, односно фаворитите одиграа според планот.
Непоразениот лидер Тиверија Брера на домашен терен со високи и убедливи 3:0 го доби Скопје со што струмичанки ја продолжуваат својата доминација на патот кон обезбедување на титулата.
Само две минути беа потребни за домашниот тим да дојде до водство од 1:0, откако стрелаше Тчеури Харуми Гоја. Во финишот на првиот дел Теона Галабовска постигна гол за 2:0 на полувреме.
Во вториот дел струмичанки немаа проблем, со уште еден гол кој беше дело на Павлинка Николовска во 74. минута, Тиверија Брера ја потврди новата победа од конечни 3:0 над Скопје.
Ас Јунајтед претрпе тежок пораз на домашен терен во Струга, откако беше декласиран од Каменица Саса со високи 1:6. Победата беше најавена уште во првиот дел од мечот откако гостинот од Каменица Саса имаше 0:4 на полувреме во Струга.
Бугарската интернационална Антонина Шопска постигна четири погодоци, а по еден гол постигнаа Гамарт Михаела, Туане Де Соуза Фрагосо и Ева Андонова.
За домашниот тим кој во оваа сезона е далеку од тимот од претходната сезона единствен стрелец беше Оливера Цоклеска, која стрелаше во 56. минута.
Шампионот Љуботен по поразот од Каменица Саса во дербито кое се одигра во претходното коло експресно се врати на победничките патеки, откако со 10:2 го торпедираше инфериорниот противник Речица.
Повеќе од јасна беше разликата во квалитетот, а победата беше сосема очекувана. Настасја Накова постигна шест погодоци во мрежата на Мелани Додевска, а по еден гол за шампионот постигнаа Александра Јовановска, Хава Мустафава, Елена Симјановска и Андреа Колевска.
За гостинскиот тим двоен стрелец беше Емили Митковска, која двата погодоци ги постигна во првиот дел од мечот кој се одигра во Тетово.
Сигурена победа од 3:0 на домашен терен салвеше Истатов над тимот на Топ Гол од Битола. Мелани Грозданова по пет минути игра погоди за 1:0, а во 13. минута Радица Чонева постигна гол за 2:0 на полувреме.
Во вториот дел од мечот Чонева постигна уште еден гол за конечни 3:0 и триумф на тимот на Истатов.
Во рамки на оваа коло слободна беше екипата на Атлетико од Битола.
- ЦЕЛА ТАБЕЛА ОД ПРВАТА ЖЕНСКА ФУДБАЛСКА ЛИГА:
| Поз. | Клуб | ОН | Поб | Н | Пор | ПОС | ПРИ | ГР | БОД |
|---|---|---|---|---|---|---|---|---|---|
| 1 | ЖФК ТИВЕРИЈА БРЕРА АД | 13 | 12 | 1 | 0 | 68 | 5 | +63 | 37 |
| 2 | ЖФК КАМЕНИЦА САСА | 13 | 11 | 0 | 2 | 46 | 10 | +36 | 33 |
| 3 | ЖФК ЉУБОТЕН | 12 | 10 | 1 | 1 | 47 | 9 | +38 | 31 |
| 4 | ЖФК СКОПЈЕ 2014 | 13 | 8 | 0 | 5 | 27 | 17 | +10 | 24 |
| 5 | ЖФК СЦ ИСТАТОВ 2015 Скопје | 12 | 5 | 1 | 6 | 18 | 31 | -13 | 16 |
| 6 | ФК ТОП ГОЛ/ЖФК | 12 | 2 | 2 | 8 | 11 | 27 | -16 | 8 |
| 7 | ФК АТЛЕТИКО/ЖФК | 12 | 2 | 1 | 9 | 11 | 31 | -20 | 7 |
| 8 | ФК АСС УНИТЕД/ЖФК | 12 | 2 | 0 | 10 | 19 | 38 | -19 | 6 |
| 9 | ЖФК РЕЧИЦА | 13 | 1 | 0 | 12 | 8 | 87 | -79 | 3 |
| 10 | ЖФК ШКЕНДИЈА Тетово(-3) | 0 | 0 | 0 | 0 | 0 | 0 | 0 | -3 |
