Вечерва беа одиграни три натпревари од четвртфиналето на футсал Купот на Македонија, со што се познати три патници кои ги потврдија билетите за место во „полуфиналето“.
Бранителот Форца во четвртфиналето ја заврши мисијата за одбрана на титулата со што ќе има нов освојување на Купот, откако тимот од Куманово уште еднаш загуби од Клими и со тоа ги заврши настапите во Купот на Македонија.
Пред неколку дена Клими славеше над Форца во шампионатот, а сега уште еднаш триумфираше тимот од Кавадарци над Форца, овој пат за прогрес во полуфиналето.
Натпреварот беше многу неизвесен и полн со предизвици. По четири минути игра Давид Крстески го отвори резултатот за водство на Клими од 1:0. За шест минути Форца дојде до водство од 1:2 со двата гола на Руфат Чалафи.
Сепак, во финишот на првиот дел Андреј Коцевски постигна гол за 2:2 пред заминувањето на пауза.
Во вториот дел Берат Рамадани во 26. минута погоди за 2:3 и ново водство на Форца, а по една минута Мартин Никовиќ погоди за 3:3.
Следуваше и пресврт за водство на Клими од 4:3, откако Артан Чилафи си постигна автогол. Во 35. минута од средбата Берат Рамадани со втор гол погоди за 4:4 и неверојатно стресен финиш.
На една минута пред крајот на мечот Виктор Аризанов постигна гол за конечни 5:4 и огромна радост за Клими. Актуелниот освојувач на Купот, Форца, останува без можноста за одбрана на Куп титулата.
Балкан без сили – Јувентус Серава лесно стигна до следна фаза, откако со 2:9 славеше голема победа за влез во полуфиналето.
Омер Османи запиша хет-трик за гостинот, двојни стрелци ба Фуркан Шабани и Армандо Алијевиќ, а пак со по еден гол се истакнаа Керим Мамуд и Шефки Бериша.
За домашниот тим во првиот дел погоди Џељал Мјаку, а во вториот дел стрелаше Ерол Далип.
Ланскиот финалист Осогово не го повтори минатогодишниот успех, откако вечерва во Крива Паланка загуби од Проект, кој важи за фаворит за двојната круна со резултат од 4:7.
За домаќинот хет-трик постигна Бојан Иванов, а еден гол беше дело на Кристијан Ивановски. За тимот од Јосифово хет-трик постигна голгетерот Марио Благојевски, по еден гол постигнаа Наум Блажевски, Бојан Јанев и Димитар Јанев, а пак автогол си постигна Кристијан Ристовски.
Утре се игра мечот меѓу Бутел и Кеги Моби, по што ќе се добие последниот патник за полуфиналето и ќе бидат познати сите екипи кои ќе се борат за место во големото финале.
