Деветтата рунда на Третата фудбалска лига – Југозапад ќе биде одбележана со долгоочекуваното враќање на старото локално дерби меѓу Славеј и Сатеска, два соседни клуба кои не се соочиле речиси 20 години. Натпреварот ќе се одигра на теренот во село Мешеишта, а истиот повеќе од јасно е дека ќе биде привлечен и интересен за локалното население, во соочување каде трите бодови се силен императив и за двете екипи.
Славеј ќе ја бара третата сезонска радост, домашниот терен и поддршката од домашната публика за нив ќе биде предност во обид за нови три бодови со кои би можеле да прогресираат до две места на табелата, а од друга страна Сатеска од Волино го има најдобриот стрелец во лигата Никола Секулоски со 16 погодоци, кој ќе биде моторот на тимот и на овој меч со тоа што Сатеска ќе бара шесто славје и ќе напаѓа за прво место.
„Нашата подготовка за овој натпревар беше темелна. Внимателно ги анализиравме последните настапи на Сатеска и верувам дека сме подготвени да се соочиме со нив. Сепак ги почитуваме како тим, не очекуваме овој натпревар да биде лесен за нас. Нашиот фокус е да ја контролираме играта и да одиграме според нашите планови. Имам доверба во моите играчи, а ние сме во полн состав, со исклучок на суспендираните играчи. Тимот е мотивиран, а ние сме решени да ги земеме сите три бода. Очекуваме фер и коректен натпревар, но на крајот, фокусирани сме да ја обезбедиме победата“, рече тренерот на Славеј, Никола Целакоски во ексклузивна изјава за Спортска Мрежа.
Фудбалерот на Славеј, Иван Стрезоски е поранешен фудбалер токму на Сатеска, тоа за него, но и за неговиот тим ќе биде предност, во изјава за Спортска Мрежа истакна дека противникот има некои опасни играчи, додава дека се подготвени и фокусирани да го дадат најдоброто од себе.
„Како играч кој ги мина последните две сезони во ФК Сатеска, точно знам што да очекувам од нив на теренот. Имаат некои опасни играчи, а ние соодветно се подготвуваме да ги неутрализираме нивните закани. Но, можам да ви кажам, атмосферата во нашиот тим е фантастична во моментов, и сите се целосно посветени на освојување на трите бода. Сите сме фокусирани и подготвени да ги дадеме нашите најдобри перформанси. Сакам да ја искористам оваа прилика и да ги поканам сите навивачи на ФК Славеј да излезат и да не поддржат во Недела. Заедно, можеме да се погрижиме бодовите да ни останат дома“, рече Стрезоски во изјавата за Спортска Мрежа.
Ваквите натпревари во Третата фудбалска лига се вистински фудбалски празник за населените места, кои со нетрпение очекуваат натпревар со цел да уживаат неколку часа во фудбалски натпревар.
Главен судија на натпреварот во Мешеишта ќе бие Горан Балески од Охрид, негов прв помошник ќе биде Љупчо Сотироски од Охрид, а пак втор помошник ќе биде Михајло Ванкоски, исто така од Охрид. За делегат е делегиран Пецо Митрески од Охрид, а пак контролор на овој меч ќе биде Богоја Маркоски од Охрид.
