Македонскиот вицепрвак Вардар го засилува ростерот со српското десно крило- Вукашин Воркапиќ. Играчот, кој настапуваше за Војводина, веќе е на пат кон Скопје и во наредните денови ќе му се стави на располагање на стручниот штаб, јавува „Моцарт Спорт“.
Првично, планот беше Воркапиќ да се приклучи на „црвено-црните“ од следната сезона, но управата успеа трансферот да го реализира порано, во зимскиот преоден рок. Со тоа, Вардар добива силно и квалитетно решение на позицијата десно крило во клучниот дел од сезоната.
28-годишниот ракометар ја започна својата кариера во Металопластика, каде што се афирмираше и стана стандарден член на репрезентацијата на Србија. Во 2021 година замина во Франција, каде што две сезони настапуваше за Иври, пред да се врати во Србија и да потпише за Војводина.
