ГРК Охрид викендов го очекува нов европски предизвик во рамките на ЕХФ Европскиот Куп. Во салата „Билјанини Извори“, охриѓани ќе го пречекаат тимот на Дукла Прага, со јасна цел – продолжување на европската приказна и пласман во следната рунда.
Пивотменот на охридскиот состав, Николаос Лиапис, истакнува дека атмосферата во тимот е позитивна и дека подготовките се одвиваат во најдобар ред. Според него, желбата е јасна – уште еден чекор напред во европското натпреварување.
„Возбудени го очекуваме престојниот европски натпревар. Тренираме напорно и сме целосно подготвени, иако немаме играно тежок меч веќе некое време. Ќе се бориме за уште едно коло во ракометна Европа.“- изјави Лиапис.
Тој, како столб на одбраната и важна алка на линијата од шест метри ќе има значајна улога во дуелот со чешкиот претставник. Неговата цврстина во дефанзива и борбеност во нападот ќе бидат клучни во обидот Охрид да наметне свое темпо уште од самиот почеток.
Натпреварот меѓу ГРК Охрид и РК Дукла Прага се игра во сабота (14.02.2026) со почеток од 18:00 часот во СЦ „Билјанини Извори“. Охриѓани ќе атакуваат на позитивен резултат и нов европски исчекор, потпирајќи се на домашниот терен и поддршката од трибините.
