Возбудливо и динамично започна втората фаза од Првата македонска кошаркарска лига, а првото коло во ТОП 8 групата донесе целосна доминација на гостинските екипи, кои забележаа победи на сите четири натпревари.
- Плеј-оф
Вардар – Струмица ФМП 76:96
Струмица ФМП одигра одличен натпревар на гостувањето „Под Кале“ и сосема заслужено стигна до убедлива победа. Клучна беше втората четвртина, во која гостите предноста од 21:18 ја претворија во високи 50:31 на полувреме. Во продолжението Вардар се обиде да се врати, но струмичани ја контролираа играта до самиот крај и со триумфот израмнија на скор 4-3.
Пандев беше прв стрелец со 23 поени, Стојанов додаде 22, Александровски 18, а Масевски 10. Кај Вардар, Ѓорѓевиќ постигна 29, а Младеновски 19 поени.
Водно Санс – Борец Баскет 87:104
Борец Баскет направи „брејк“ во Скопје со доминантно прво полувреме, по кое велешани водеа со недостижни 63:38. Седум играчи на Борец завршија со двоцифрен учинок. Чадамов реализираше 24 поени, Тимоти Џејмс 22, Штерјов 15, Сапроновски 13, Пајиќ 11 и Трпески 10. За Водно Санс, Стојановски имаше 21, Трајанов 19, Кузманов 15 и Букрлишев 12 поени.
Мега Баскет – Бутел 99:106
Бутел стигна до многу важна гостинска победа во Прилеп со ефикасен напад и дури 106 поени. Петмина играчи беа двоцифрени – Атанасов со 26 поени, Јанески и Киров со по 22, а Хот и Мартиноски со по 10. Кај Мега Баскет, Враниќ постигна 25, Јовановски 17, Домлески 14 и Димитриевски 11 поени.
Охрид – Соколи 1933 55:75
Соколи 1933 ја комплетираа серијата гостински победи со сигурен триумф во „Билјанини Извори“. Клучна беше третата четвртина, добиена со 24:11, по која штипјани стигнаа до победа од 20 поени разлика и скор 4-3. Тодороски постигна 17 поени, Халлитон 13 и Костадинов 10. Кај Охрид, Кузманоски имаше 13, а Бојовски 12 поени.
- Плеј-аут
Тетекс ТТК – Струмица Ролинг 88:50
Тетекс ТТК сигурно го отвори плеј-аутот со убедлива победа и чекор поблиску до опстанокот. Крстевски реализираше 23 поени, Костоски 12, а Теофиловски и Д. Крстевски по 11. Кај Струмица Ролинг, Ѓорѓиев постигна 13 поени.
Младинец – Спортисимо 101:86
Младинец ја забележа првата победа во плеј-аут фазата. Шуменовски и Матев постигнаа по 24 поени, додека новиот Американец Креспо додаде 19. За Спортисимо, Митрев имаше 18, Максимов 17, Ристовски 14 и Радически 10 поени.
Црн Дрим – Овче Поле 102:77
Црн Дрим беше убедлив пред домашната публика и со победата се искачи на делба на првото место со скор 4-1. Д. Шабани блесна со 32 поени, А. Шабани додаде 17, Камилоски 12 и Петрески 10. За Овче Поле, Стерјовски постигна 18, а Здравковски 15 поени.
По првото коло од втората фаза, трката во плеј-офот и борбата за опстанок во плеј-аутот ветуваат уште многу неизвесност и возбудливи натпревари во продолжението од сезоната.
