Македонскиот напаѓач Шефит Шефити направи важен чекор во својата кариера, откако го напушти мак-фудбал и потпиша договор со Хата Клуб од Обединетите Арапски Емирати.
27-годишниот фудбалер зад себе има одличен период во дресот на Арсими од Чегранe, каде во два наврати беше еден од најконстантните и најопасните офанзивци на тимот. Токму добрите настапи во есенската полусезона беа клучни за да го привлече вниманието од странство и да си обезбеди меѓународен трансфер. Сега веќе екс фудбалерот на Арсими во есенскиот дел во ПМФЛ постигна 11 погодоци на 12 натпревари и забележа две асистенции.
Шефити своите фудбалски чекори ги започна во Шкендија од Тетово, клуб со кој постигна и најголем дел од своите клупски успеси. Во својата кариера настапуваше и за Ренова, Приштина од Косово, Беса од Добри Дол, како и за Арсими, каде првпат играше од септември 2024 до јануари 2025, а потоа повторно од август 2025 до јануари 2026 година.
Зад неговото име стојат и значајни трофеи – два шампионски пехари во Првата македонска лига со Шкендија во сезоните 2017/18 и 2018/19, како и освоениот Куп на Косово со Приштина во сезоната 2022/23.
Трансферот во Хата Клуб е реализиран со посредство на неговиот менаџер, тетовецот Шендрит Заими, а за Шефити ова претставува нова можност да се докаже на интернационалната сцена и да ја продолжи својата фудбалска приказна надвор од Балканот.
