Бутел Скопје направи голем чекор кон пласман во плеј-офот со убедлива гостинска победа над Струга од 35-24. Со овие бодови, скопскиот тим стигна до бројката од 20 и цврсто се држи на петтата позиција, додека Струга останува претпоследна со само шест бодови.
Прашањето на победникот беше решено уште во првото полувреме. Избраниците на Горан Кузманоски одиграа доминантни 30 минути, поведоа со 20-9 и во еден момент имаа и плус 12, оставајќи ја неизвесноста да трае само во воведните пет минути.
Во продолжението темпото очекувано опадна, а двајцата тренери им дадоа шанса на сите ракометари. Немаше резултатски драми, туку рутинско приведување на мечот кон крај од страна на гостите.
Најефикасни кај Бутел беа Димитар Узунчев со девет и Дејан Михајловиќ со седум погодоци, додека кај Струга се истакна Наум Костов со седум голови.
Во следното коло Струга ја очекува гостување кај Пролет, а Бутел Скопје на домашен терен ќе се соочи со Вардар.
