Македонскиот шампион Љуботен забележа пораз на пријателскиот натпревар против шампионот на Косово, Митровица, кој заврши со резултат 3:1 во корист на гостинската екипа.
Натпреварот послужи како квалитетна проверка за двете екипи во пресрет на продолжението од националните шампионати и можност за темпирање на формата пред пролетниот дел од сезоната.
Во победничкиот состав на Митровица се истакна Едона Криезиу, која постигна два погодоци, додека Блерта Шала го комплетираше резултатот со уште еден гол. За Љуботен единствен стрелец беше репрезентативката на Хаити, Лори-Ен Моисет.
Екипата на Љуботен ќе продолжи со одигрување на пријателски натпревари со цел максимално подготвена да го дочека продолжението од сезоната, во кое ќе води жестока битка за одбрана на двојната круна.
Во трката за шампионската титула, најголем конкурент на тетовскиот состав останува Скопје, кое моментално е лидер на табелата со два бода повеќе од Љуботен, кој се наоѓа на втората позиција.
