Викендот со натпреварите од 9. коло во Трета лига – Исток ќе заврши есенската полусезона. Без разлика на исхдот во последното деветто коло сигурно е дека Слога Виница ќе биде есенски шампион и за време на зимската пауза како што веќе најави Спортска Мрежа ќе се ангажираат неколку квалитетни играчи и во пролетниот дел Слога Виница ќе треба да го потврди првото место кое води кон баражот за Втора лига.
Изминатиот викенд Слога Виница го доживеа првиот пораз, откако беше поразена од Карбинци со 2:1 на гостински терен, но и така останува на првото место на табелата со 21 бод или четири повеќе од Овче Поле кој е втор со 17 бодови.
Последното деветто коло во Трета лига – Исток ќе биде затворено со дербито во Виница каде ќе се соочат лидерот Слога и Овче Поле од Свети Николе. Дерби на првиот и вториот на табелата, дерби за трите бодови. Дербито на колото е натпревар од висок ризик, ни потврди секретарот на Трета лига – Исток, Столе Тошев.
Тиверија сака сезоната да ја заврши со позитивен резултат, а мечот наместо во Струмица, ќе се игра на “Кукуш” во Турново во локално дерби со поранешниот прволигашот Хоризонт Турново. Овој меч требаше да се одигра на теренот со вештачка трева во Струмица, но како што дознава ексклузивно Спортска Мрежа, поради презафатеност на теренот, мечот ќе се игра на стадинот “Кукуш” во Турново.
Малешевско дерби ќе се игра во Делчево каде ќе се соочат Брегалница и Малеш од Берово, а деветтата рунда носи уште две локални дербија. Натпреварот е прогласен од висок ризик, а оваа информација ни ја потврди секретарот на Трета лига – Исток, Столе Тошев.
Светлост во Зрновци ќе го пречека тимот на Карбинци, додека пак Ударник во Пирава ќе игра против Дојранско Езеро.
Натпреварите се играат в недела од 13 часот.
