Македонскиот стратег Емил Грнев денеска го имаше своето деби како шеф на стручниот штаб на Санта Луција во Втората лига на Малта, откако неговиот тим одигра 2:2 против Мелита – екипа која се бори за пласман во Првата лига.
Се одигра исклучително возбудлив натпревар, во кој Санта Луција прикажа добра тактичка поставеност и јасна фудбалска филозофија под водство на Грнев, но примен гол во 89. минута значеше испуштени три бода.
Резултатот го отвори Адријан Борг во 35. минута, со што тимот на Грнев на полувреме замина со предност од 1:0. Во второто полувреме Матијас Вела израмни на 1:1 во 76. минута, но само пет минути подоцна Санта Луција повторно дојде во водство. Македонскиот напаѓач Филип Петковски беше прецизен и погоди за 2:1.
Сепак, гостите успеаја да избегнат пораз, откако интернационалецот од Нигерија, Квадри Алионида, во 89. минута постигна гол за конечни 2:2 и поделба на бодовите.
На овој начин, искусниот стратег Емил Грнев со реми ја започна својата тренерска епизода во Малта. Тој работи заедно со Борче Постолов како негов прв асистент, за што веќе информираше Спортска Мрежа, додека дел од стручниот штаб е и Португалецот Рубен Круз, кој ја извршува улогата на аналитичар.
Во следното коло, Санта Луција под водство на Грнев ќе гостува кај второпласираниот тим Бирзебуга.
