Ракометарите на ГРК Охрид во февруари влегуваат во можеби најтешкиот период од сезоната, со натпревари на секои неколку дена и паралелни обврски во македонската Супер лига и во EHF Европскиот куп. Календарот не остава простор за одмор, а секој меч носи резултатско и психолошко значење.
Имено, Февруарскиот маратон започнува на 4 февруари, кога во рамки на 19. коло од Супер лигата, Охрид ќе го пречека РК Прилеп. Само шест дена подоцна следува гостување кај МРК Куманово (10.02), по што фокусот веднаш се префрла на европската сцена.
На 14 февруари, охриѓани, на домашен терен го играат првиот осминафинален натпревар од EHF European Cup против чешкиот претставник РК Дукла Прага, меч кој може да го одбележи европскиот пат на клубот оваа сезона.
Домашните обврски продолжуваат со дуелот против РК Бутел Скопје (18.02), а само три дена подоцна следува реваншот во Прага (21.02), каде што ќе се решава пласманот меѓу најдобрите осум во Европа.
Февруари завршува со уште еден важен Суперлигашки натпревар – гостување кај РК Пролет 62 (24.02), а веднаш потоа стартува и плеј-офот на крајот од месецот (28.02 / 01.03).
Густината на распоредот ќе ја тестира ширината на ростерот на Ројевиќ, физичката подготвеност и менталната стабилност на тимот. Натпреварите во Супер лигата се клучни за позиционирање пред плеј-офот, додека европските дуели носат престиж и можност за историски исчекор.
ГРК Охрид влегува во период во кој нема право на опуштање. Февруари ќе биде месец на вистината, месец во кој ќе се види колку овој тим е подготвен да одговори на високите амбиции – и дома и во Европа.
