Непоразениот есенски шампион во Првата ракометна лига, екипата на Младост денес одигра нов пријателски натпревар во рамки на зимските подготовки против суперлигашот Еурофамр Пелистер 2 во Богданци, а кој заврши со 33:30 за тимот на Горан Андоновски.
Во првиот дел Младост имаше предност од 17:14, а во текот на целиот меч имаше постојана резултатска предност.
Амбициозниот Младост без пораз го заврши есенскиот дел и во пролетниот дел ќе цели кон потврда на првата позиција и да се врати во ракометната елита на Македонија. Претходно, Младост го доби суперлигашот Тиквеш во Кавадарци, со што уште еднаш се потврдува квалитетот на овој тим кој е прв фаворит за враќање во Суперлигата, а како најсериозен конкурент е само Мулти Есенс.
Тимот од Богданци се засили со средниот бек Марио Миланов, кој ќе биде единствено засилување оваа зима во тимот од Богданци, со оглед на тоа што ростерот е сочуван, освен заминувањето на Антонио Николоски во БиХ.
Младите „пелистерци“ во последните четири кола од регуларниот дел на Суперлигата ќе се обидат да фатат место во плеј-офот.
