Феноменалниот Матиас Гидсел беше клучен за пласманот на Данска во финалето на Европското првенство, а неговата блескава голгетерска партија го стави на врвот на статистиките, израмнувајќи го со македонскиот ас- Кирил Лазаров.
Имено, Гидсел постигна седум гола во вечерашното полуфинале против Исланд, со што неговиот вкупен број на погодоци на шампионатот достигна 61. Со оваа бројка, тој се израмни со рекордот на нашиот најдобар голгетер- Кирил Лазаров, кој на ЕП 2012 во Србија постигна 61 погодок и долго време беше несовладлив на врвот на листата на стрелци.
Меѓутоа, по завршувањето на мечот за петтото место, на листата со 61 гол се израмни и Португалецот- Франциско Кошта. Лидер на оваа листа е норвешкиот стрелец Сандер Сагосен, кој на ЕП 2020 постигна 65 гола.
Со финалето што следува, Гидсел има реална шанса да го собори рекордот на Сагосен. Исто така, Данецот Симон Питлик, со 56 погодоци досега на шампионатот, може со одличен настап во финалето да се искачи на врвот на листата.
ЛИСТА НА НАЈМНОГУ ГОЛОВИ НА ЕДНО ЕП
65 – Сандер Сагосен (Норвешка, 2020)
61 – Кирил Лазаров (Македонија, 2012)
61 – Матиас Гидсел (Данска, 2026)
61 – Франциско Кошта (Португалија, 2026)
59 – Омар Инги Магнусон (Исланд, 2022)
58 – Стефансон (Исланд, 2002)
