Ракометната репрезентација на Данска уште еднаш покажа зошто важи за еден од главните фаворити на Европското првенство. Домаќинот во Хернинг славеше убедлива победа над Шпанија со 36:31 и со тоа направи голем исчекор кон пласман во полуфиналето, додека „црвената фурија“ практично ги загуби сите надежи за место меѓу најдобрите четири.
Натпреварот започна во висок ритам, со Данците кои рано наметнаа свое темпо и поведоа, но Шпанија не дозволи резултатска ерупција. Во текот на првото полувреме се играше израмнето, со минимална предност за скандинавската селекција, која на пауза замина со плус два.
Возбудувањата продолжија и на стартот од вториот дел, кога Шпанците накратко успеаја да израмнат, но токму тогаш следуваше клучниот момент на мечот. Данска ја затегна одбраната, голманот Емил Нилсен влезе во серија одбрани, а нападот проработе преку брзите крила и транзицијата. Серјата од неколку голови без одговор ја однесе Данска на убедлива предност, која до крајот рутински ја сочува.
Најефикасен во победничкиот табор беше Емил Јакобсен со осум погодоци, додека значаен придонес дадоа и Киркелоке и Питлик со по шест голови. Кај Шпанија, најрасположен беше Маркос Фис, кој постигна девет погодоци, но неговиот учинок не беше доволен за да се избегне поразот.
Со овој триумф Данска останува во одлична позиција во групата и со голема самодоверба го очекува следниот предизвик, додека Шпанија ќе мора да се помири со фактот дека ова Европско првенство ќе го заврши без борба за медал.
