Екипата на Силекс од Кратово продолжува со активностите во зимскиот преоден рок и ангажира уште едно ново име во својот ростер. Нов член на кратовскиот прволигаш е 23-годишниот Михаил Димитриевски, кој пристигнува од редовите на Работнички од Скопје.
Димитриевски е фудбалер кој може да одговори на повеќе позиции, покривајќи ги крилните места како во нападот, така и во одбраната на двете страни од теренот. Во текот на есенската полусезона настапуваше за Работнички, а со својата поливалентност треба да донесе дополнителни решенија во тимот на Силекс.
Во досегашната кариера има настапувано и за Њу Старс, Локомотива, Пехчево и Брегалница, а зад себе веќе има значајно искуство во домашниот шампионат со вкупно 100 одиграни натпревари во Првата македонска фудбалска лига.
Силекс, кој по есенскиот дел од сезоната се наоѓа на четвртото место на табелата, во моментов се подготвува за продолжението од првенството во Анталија, Турција, каде стручниот штаб ја темпира формата на екипата и ги воигрува новите засилувања пред пролетните предизвици.
