Третолигашот Овче Поле од Свети Николе на 28 јануари ќе ги започне зимските подготовки за предизвиците кои ќе бидат кон клубот.
Со првата прозивка и првиот тренинг на Градскиот стадион во Свети Николе третолигашот ќе ја започне мисијата за обезбедување на првото место во Трета лига – Исток, кое води кон баражот за Втора лига.
Овче Поле во сезона 2021/2022 беше шампион во Трета лига – Исток и играше бараж за влез во Втора лига, но истиот го загуби од сега веќе прволигашот Арсими и така остана во третолигашкото друштво на Истокот.
Според информации на Спортска Мрежа ќе бидат одиграни неколку пријателски натпревари кои ќе послужат како проверка за како оди подигањето на формата.
Овче Поле есенскиот дел во Трета лига – Исток го заврши на третото место со 22 бодови на своето конто, шест помалку од непоразениот лидер Победа Валандово, па тоа ќе биде предизвик за тимот од Свети Николе да успее да го стигне лидерот од Валандово и да дојде до посакуваната цел.
Во следниот период се очекува да пристигне и некое засилување во тимот од Свети Николе, а со тоа Овче Поле да има поквалитетен ростер во трката за челната позиција и баражот за Втора лига.
