Младиот тренер Александра Рубаноска е пред нов значаен чекор во својата кариера, откако 24-годишната охриѓанка се раздели со поранешниот шампион ЖФК Билјанини Извори од Охрид.
Рубаноска во изминатиот период беше шеф на стручниот штаб на сениорскиот тим на Билјанини Извори, а паралелно работеше и со младинските категории на клубот, кој во актуелната сезона има јасна амбиција за враќање во Првата женска фудбалска лига.
По завршувањето на ангажманот во матичниот клуб, Рубаноска е пред можност за градење на интернационална тренерска кариера, а се очекува во наредниот период преговорите да добијат позитивна завршница и таа да стави потпис на договор со клуб надвор од Македонија.
Како фудбалерка, Рубаноска настапуваше за Билјанини Извори и за струшкиот Ас Јунајтед, по што донесе одлука целосно да се посвети на тренерската професија. Таа поседува УЕФА Б лиценца, а веќе има и интернационално искуство, откако шест месеци работеше со младинските категории на ЖФК Дубровник, во рамки на процесот на стручно стажирање. Новиот ангажман во странство би претставувал чекор напред во развој на нејзината тренерска кариера.
