Фудбалскиот клуб Арсими официјално го промовираше своето најново засилување во офанзивниот ред пред продолжението на сезоната. Нов член на „жолто-црните“ е искусниот напаѓач Ремзифаик Селмани, фудбалер со богато искуство и значајни успеси и на домашната и на меѓународната сцена.
Селмани во Арсими пристигнува од редовите на косовскиот Феризај, а зад себе има импресивна кариера во повеќе земји. Кариерата ја започна во Ренова, по што направи трансфер во унгарскиот Ујпешт. Подоцна беше дел од неколку реномирани клубови, меѓу кои Шкендија, Гостивар, Брегалница и Беса од Добри Дол, а настапуваше и за унгарскиот Мезекевешд.
Надвор од Македонија, Селмани го носеше дресот и на Партизан од Албанија, како и на Ллапи од Косово, со што дополнително го збогати своето интернационално искуство. Во својата кариера има и значајни трофеи, откако беше шампион со Шкендија и со Партизан, што го вбројува меѓу најзвучните имиња кои во последниот период потпишале за Арсими.
Со клубот од Чегране, Ремзифаик Селмани потпиша договор на една и пол година, а од таборот на Арсими изразија големо задоволство од неговиот ангажман, очекувајќи да донесе квалитет, искуство и ефикасност во нападот.
Клубот му посака добро здравје и многу успех во дресот на Арсими, со надеж дека Селмани ќе биде еден од клучните фактори во остварувањето на целите во продолжението од сезоната.
