Викендов стартува и втората полусезона во машката одбојкарска лига со натпреварите од плеј-оф и плеј-аут фазата.
Шесте најдобро пласирани екипи по завршувањето на првиот дел од сезоната, односно лигашката фаза – Штип УГД, Струмица 47&72, ГОК Борец, Работнички 71&22, Универзитет во Тетово и Сушево – според пропозициите продолжуваат во плеј-оф разигрувањето, при што ги пренесуваат бодовите од првиот дел. Тие ќе играат двокружно, по системот „секој со секого“, а по завршувањето на оваа фаза, четирите најдобро пласирани екипи ќе обезбедат пласман во полуфиналето и ќе се борат за шампионската титула.
Во првото коло од плеј-офот, в сабота, лидерот на табелата Штип УГД го пречекува тимот на Сушево, додека најинтересниот дуел ќе се одигра во Скопје, каде Работнички 71&22 ќе се соочи со ГОК Борец. Натпреварот меѓу Струмица 47&72 и Универзитет во Тетово е одложен.
Екипите кои го завршија првиот дел од сезоната во долниот дел од табелата – Лирија, Шкендија, Македонија Џио, Весна Пробиштип, Јанта Волеј и Скопје – ќе настапуваат во плеј-аут фазата, каде ќе разигруваат за конечен пласман. И овие тимови ги пренесуваат бодовите од првиот дел и ќе играат двокружно, дома и на гости, по што ќе биде познат нивниот конечен распоред во првенството.
Сите натпревари од првото коло во плеј-аут фазата се закажани за во сабота. Лирија на домашен терен ќе игра против Јанта Волеј, Шкендија ќе го пречека Скопје, додека Македонија Џио ќе се соочи со Весна Пробиштип.
