Фудбалскиот клуб Работнички го официјализира враќањето на искусниот стопер Егзон Белица, кој повторно ќе го носи дресот на „романтичарите“ во вториот дел од сезоната. 35-годишниот дефанзивец доаѓа како значајно засилување во клучен момент, во обид клубот да избори опстанок во Првата македонска фудбалска лига.
По кратката епизода во Шкендија, со која се раздели во зимскиот преоден рок, Белица одлучи да се врати во средината која добро ја познава. Тој веќе има зад себе успешен период во Работнички, каде во минатото беше и капитен и еден од лидерите на тимот, а деновиве го одработи и првиот тренинг под водство на Муарем Муарем.
Белица зад себе има богата интернационална кариера со настапи во Косово, Албанија, Финска, Летонија и Романија, а на домашната сцена, покрај Работнички, настапувал и за Шкендија и ГФК Охрид. Неговото искуство и стабилност во последната линија треба да бидат еден од клучните адути на Работнички во продолжението од сезоната.
Клубот од Дебар Маало по првиот дел од шампионатот се наоѓа во долниот дел од табелата и го очекува тешка битка за бодови, а враќањето на Белица се смета за јасен сигнал дека Работнички сериозно влегува во борбата за опстанок.
