Хрватската репрезентација го завери настапот во главната фаза на Европското првенство со убедлива победа над Холандија од 35-29 во директниот дуел во Малме. Натпреварот понуди рамноправна борба во поголемиот дел од првото полувреме, со чести промени во водството, сè додека „коцкестите“ не ја искористија серијата во финишот од првиот дел и со погодокот на Циндриќ во 20. минута првпат создадоа поосетлива предност (11-8).
Иако Холандија двапати успеа да се доближи на еден гол разлика, избраниците на Дагур Сигурдсон со цврста одбрана и брзи реализации ја задржаа контролата и на пауза заминаа со плус два (15-13).
Во продолжението сценариото остана исто – Хрватска диктираше темпо, а Холандија упорно одбиваше да се предаде. Клучниот момент се случи во 41. минута, кога Холанѓаните не ја искористија контрата за водство, а стативата им помогна на Хрватите. Во завршните десет минути предноста порасна на пет голови (30-25), што беше доволно за мирен финиш и славје по конечните 35-29. До крајот од групната фаза Хрватска ќе се бори со домаќинот Шведска за првата позиција во групата.
Во Хернинг, Србија пропушти шанса сама да го обезбеди пласманот во главната фаза. По големата победа над Германија, „орлите“ разочараа против Австрија и со пораз ги ставија своите надежи во рацете на Шпанија. Србите тешко влегуваа во ритам и во најголемиот дел од првото полувреме беа во негатива, а предноста ја презедоа дури во самиот финиш (13-11). Сепак, на пауза заминаа со минимални 13-12.
Второто полувреме целосно им припадна на Австријците, кои најпрво израмнија, а потоа и поведоа, одржувајќи стабилна разлика од два гола, што во 54. минута порасна и на плус три. Во драматичниот финиш Србија успеа да се доближи на само еден погодок (26-25), резултат кој ѝ носи пласман во следната фаза само доколку Шпанија ја совлада Германија.
Во Осло, дуелот меѓу Чешка и Украина имаше само престижен карактер, откако двете селекции претходно ги загубија шансите за главната фаза. Во борбата за третото место во групата Ц подобра беше Чешка, која доминираше во текот на целиот натпревар и заслужено славеше со убедливи 38-29 (17-14).
