Една од најдобрите македонски фудбалерки, Хава Мустафа, која со години е меѓу најдобрите стрелци во домашниот шампионат, се најде на радарот на неколку странски клубови кои пројавуваат сериозен интерес за нејзините услуги.
Според информациите на Спортска Мрежа, за фудбалерката на македонскиот шампион Љуботен конкретен интерес покажуваат шведскиот гигант Розенгард и српскиот Спартак Суботица. Дополнително, според нашите сознанија, Мустафа е следена и од уште неколку странски екипи, што е јасна потврда за нејзиниот квалитет и одличната форма во изминатиот период.
Ова воедно претставува сериозен предизвик за Љуботен да ја задржи својата најдобра фудбалерка, додека Мустафа ќе има можност внимателно да ја избере најдобрата опција за продолжување на својата кариера.
28-годишната офанзивка од август 2024 година го носи дресот на тетовскиот клуб и настапува во извонредна форма. Во квалификациите за Лигата на шампионите, Мустафа блесна против Пјуник, постигнувајќи неверојатни четири погодоци во убедливата победа од 4:0, практично самостојно решавајќи го натпреварот. Таа беше стрелец и на дуелот против НСИ Рунавик.
Во есенскиот дел од Првата женска фудбалска лига, Мустафа постигна осум голови, додека минатата сезона беше убедливо најдобар стрелец во шампионатот со импресивни 32 погодоци. И во претходните сезони редовно се наоѓаше меѓу најдобрите голгетерки.
Фудбалската кариера ја започна во Единство, каде настапуваше до август 2017 година. Потоа се пресели во Тетово, каде играше до јули 2019, по што следуваше трансфер во Шкендија, во која настапуваше од 2019 до 2024 година. Од минатото лето е член на актуелниот шампион ЖФК Љуботен.
Хава Мустафа е и стандардна репрезентативка на Македонија, со значаен придонес во националниот тим.
