Актуелниот шампион во Првата женска фудбалска лига, ЖФК Љуботен, ќе одигра шест пријателски натпревари преку кои ќе ја проверува формата во пресрет на пролетниот дел од сезоната, во кој тетовскиот клуб ќе атакува на одбрана на двојната круна.
Љуботен ќе има два домашни и четири меѓународни тест-натпревари, што ќе му овозможи на стручниот штаб јасен увид во моменталната подготвеност и напредокот на екипата.
Првиот контролен меч е закажан за 31 јануари против Вардар и ќе се одигра во Тетово. Потоа следува дуелот со Митровица на 3 февруари во Косово, додека на 9 февруари македонскиот шампион ќе се соочи со Машинац во Ниш, Србија. Само два дена подоцна, во Белград, Љуботен ќе одигра пријателски натпревар против Црвена Звезда.
На 14 февруари, во Струмица, тетовскиот тим ќе ја провери формата против Тиверија Брера, а серијата контролни средби ќе биде заокружена на 18 февруари во Охрид, со дуел против црногорската Будуќност.
Преку овие натпревари, Љуботен ќе се соочи со исклучително силни и квалитетни противници, што претставува сериозен тест во пресрет на продолжението од сезоната. Шампионот есенскиот дел го заврши на второто место на табелата, со два бода помалку од лидерот Скопје, што најавува исклучително возбудлива и неизвесна пролет.
