Бодот против Португалија донесе олеснување и еуфорија, но реалноста е јасна – тој резултат ќе вреди само ако во последното коло ја совладаме Романија. Во спротивно, спектакуларното враќање и одбраните на Томовски ќе останат само убав момент, без вистинска тежина во конечниот пласман.
Македонија влегува во решавачкиот меч со јасна цел: место меѓу првите три во групата. Теоретски, постои и можност за сензационално второ место зад Данска, но за такво сценарио ќе ни биде потребна убедлива победа над Романците и висок пораз на Португалија од домаќинот, со вкупна гол-разлика од најмалку 18 гола. Сепак, и минималниот триумф ќе значи исполнување на основната мисија – пласман меѓу најдобрите 16 селекции на шампионатот.
Таков исход носи капитални придобивки. Македонија би играла само еден бараж за пласман на Светското првенство во Германија следната година и со големи шанси би влегла како носител во ждрепката.
Спротивното сценарио е далеку понеповолно: четврто место во групата, финален пласман меѓу 18. и 24. позиција, два баражи и губење на предноста на носител во вториот круг.
Токму затоа дуелот со Романија е многу повеќе од натпревар од групната фаза. Тој ќе ја одреди позицијата на Македонија во европскиот ракомет и патот кон светската сцена во следните години.
