Шампионот Шкендија официјално потврди дека Флорент Рамадани и Фитон Адеми нема да бидат дел од клубот во продолжението на шампионатот. По инсистирање на самите фудбалери, раководството на тетовскиот клуб покажа разбирање и им овозможи да побараат нови средини каде што ќе добијат поголема минутажа и простор за игра.
Како што соопшти клубот, договорите со двајцата фудбалери се раскинати по заемна согласност. И Рамадани и Адеми во изминатите години беа важен дел од проектот на Шкендија, растејќи професионално и давајќи максимум секогаш кога беа на располагање на стручниот штаб. Од клубот потенцираат дека нивната посветеност, професионализам и коректен однос секогаш биле на високо ниво, поради што одлуката за разделба е донесена во духот на меѓусебна почит и соработка.
Флорент Рамадани, 25-годишен играч од средниот ред, беше член на првиот тим на Шкендија цели шест сезони. Во тој период запиша вкупно 145 официјални настапи, од кои 119 во првенството, пет во Купот на Македонија и 21 во европските натпреварувања, постигнувајќи 20 голови. Како стабилен и посветен играч, тој остави силен печат во средниот ред на „црвено-црните“.
Од друга страна, 23-годишниот напаѓач Фитон Адеми беше дел од првиот тим во последните три сезони, откако претходно настапуваше за Струга, Воска и Беса од Добердол. Во дресот на Шкендија одигра 70 официјални натпревари (53 првенствени, пет куп-натпревари и 12 во Европа), при што постигна 17 голови и даде значаен придонес во офанзивата на тимот.
ФК Шкендија им се заблагодари на Флорент Рамадани и Фитон Адеми за сè што направија за клубот и им посака многу успех во продолжението на нивните професионални кариери.
