Кошаркарската федерација на Македонија (КФМ) официјално информираше дека ќе организира лицитација и работен состанок со сите заинтересирани страни за организација на националниот кошаркарски Куп „Благоја Георгиевски – Буштур“ за 2026 година, во машка и во женска конкуренција.
Право на учество имаат физички лица, здруженија, акционерски друштва и други правни субјекти кои ќе пројават интерес за преземање на организацијата на овој престижен национален настан. Целта на лицитацијата и работниот состанок е навремено, транспарентно и суштинско усогласување околу сите клучни аспекти поврзани со организацијата на Купот.
На состанокот ќе се разгледуваат и прецизираат датумите и термините за одигрување на натпреварите, изборот и техничката подготвеност на спортските сали, исполнувањето на пропишаните организациски, безбедносни и логистички услови, протоколите и придружните активности за непречено одвивање на натпреварите, како и координацијата со службените лица, медиумите и останатите релевантни фактори. Посебен акцент ќе биде ставен на подигнување на севкупното ниво на организација, промоција и достоинствено одбележување на Купот како национален спортски настан.
Лицитацијата ќе се одржи на 26 јануари 2026 година (понеделник), со почеток во 12:00 часот, во салата за состаноци на Кошаркарската федерација на Македонија. Почетната сума за лицитација изнесува 200.000 денари за организација на Купот во женска конкуренција и 500.000 денари за Купот во машка конкуренција.
Во наведените износи се вклучени комплетните трошоци за службените лица (судии, делегати, контролори, записничка маса и статистика), како и организациска и координациска поддршка од страна на федерацијата. Таа опфаќа надзор и супервизија на исполнувањето на пропишаните услови, како и официјална комуникација и информирање на јавноста за време на финалниот турнир.
Обезбедувањето на спортскиот објект, целокупната техничка инфраструктура (спортска опрема, семафори, ИТ и интернет поддршка, аудио-визуелна опрема, медиумски и ТВ/стриминг предуслови, како и награди за најдобрите), како и целокупната логистика поврзана со функционирањето на салата, претставува исклучива обврска на организаторот, освен ако поинаку не биде утврдено со посебен писмен договор.
Како услов за учество во лицитацијата, сите заинтересирани субјекти најдоцна до 22 јануари 2026 година (четврток) се должни да уплатат 10 проценти од почетната сума за Купот за кој аплицираат. Дополнителните организациски, технички и финансиски обврски, како и критериумите за избор на организатор, ќе бидат детално образложени и прецизирани за време на работниот состанок, во согласност со важечките пропозиции, добрите практики и највисоките организациски стандарди.
Од КФМ упатија јавен повик до сите заинтересирани субјекти навремено да го потврдат своето присуство и со сериозен, одговорен и професионален пристап да се вклучат во процесот за избор на организатор на еден од најзначајните национални кошаркарски настани.
