Европската ракометна федерација (ЕХФ) денеска ја објави судиската распределба за првото коло од Европското првенство 2026, а дуелот меѓу Данска и Македонија ќе биде доверен на молдавските арбитри Алексеј и Игор Ковалчиук.
Натпреварот од групата Б, во кој македонската репрезентација ќе се соочи со главниот фаворит за златниот медал, е закажан за 16 јануари во Хернинг и ќе претставува вистински тест уште на самиот старт на шампионатот.
По неочекуваното отстранување на Начевски и Николов од судиската листа „во пет до дванаесет“, Македонија на ЕП 2026 ќе има само една судиска двојка. Станува збор за битолчаните Димитар Митревски и Благојче Тодоровски, кои за првпат ќе ја претставуваат нашата земја меѓу европската елита на едно Европско првенство.
Митревски и Тодоровски своето деби на големите натпреварувања ќе го имаат на 17 јануари, кога во рамки на групата Е, во Малме, ќе ја делат правдата на дуелот меѓу домаќинот Шведска и селекцијата на Холандија.
