Каменица Саса во рамки на 11. коло обезбеди минимална, но голема победа на Новаци од 0:1, „рударите“ до трите бодови дојдоа во финишот од мечот односно во 90. минута, а стрелец на одличниот гол вреден три бодови беше Тони Мичковски кој игра во одлична форма.
За 23-годишниот фудбалер од Берово ова беше четврти погодок сезонава во дресот на Саса, откако претходно два гола постигна против Кожуф со што Саса обезбеди бод, а стрелаше и против Брегланица во Штип.
- ГОЛОТ НА ТОНИ МИЧКОВСКИ ЗА ПОБЕДА НА САСА НАД НОВАЦИ:
„Беше тврд натпревар, со малку шанси за голови, но на крајот пресуди нашата желба за победа и приклучокот во горниот дел на табелата. Влегов од клупа и се играше финишот од натпреварот кога соиграчот Махир Ајрули ја украде топката од противникот на дваесеттина метри од голот ме проигра и постигнавме погодок кој беше вреден три бодови и си одиме среќни и за доволни за Македонска Каменица“, рече Мичковски во изјава за Спортска Мрежа.
Мичковски е во одлична форма и бележи одлични игри, тој е втор најдобар стрелец за Саса со четири голови, зад Андреј Симевски кој има седум гола за „рударите“. Саса го дели осмото место на табелата со радовишки Детонит Плачковица со по 15 бодови, а во следното коло Саса одново гостува овој пат на „Цвај арената“ во Неготино против Вардар Неготино.
