Прволигашот Силекс и официјално ги започна подготовките за пролетниот дел од сезоната. Тимот на Александар Васоски првата фаза од зимските подготовки ќе ја одработи во Кратово, каде што беше извршена и прозивката, а на 17 јануари кратовчани се селат во Анталија, каде ќе одиграат неколку контролни натпревари со странски ривали.
Засега единствено ново име во ростерот е младиот Матеј Ѓерасов, кој пристигна од Работнички и веќе му се стави на располагање на стручниот штаб. Во исто време, Силекс се раздели со неколку фудбалери – Алдин Хрвановиќ, Миљан Говедарица и Бојан Рајков. Како што веќе објави Спортска Мрежа, Рајков ја продолжи кариерата во второлигашот Брегалница, додека Хрвановиќ е нов член на Радник Бјелина.
Од клубот најавуваат дека во наредниот период се очекуваат и нови засилувања, со цел екипата максимално подготвена да го дочека продолжението од шампионатот.
Првенството во ПМФЛ продолжува во првата недела од февруари, а Силекс пролетната полусезона ќе ја отвори на домашен терен против екипата на Башкими.
