Струга Трим Лум го официјализираше ангажманот на новото засилување во средниот ред, откако во своите редови го донесе младиот Адриан Зенделовски. Дваесетгодишниот фудбалер пристигнува од шведскиот Олимпик, каде во текот на сезоната забележа 21 настап и постигна пет погодоци, оставајќи солиден впечаток со своите настапи.
Зенделовски важи за динамичен играч од средината на теренот, кој може да придонесе и во офанзивата, а во таборот на стружани се очекува да биде значајно освежување за ростерот на тренерот Бледи Шкемби во продолжението од сезоната.
Струга Трим Лум есенскиот дел од првенството го заврши на втората позиција на табелата, со само еден бод заостанување зад лидерот Вардар, а со ваквите засилувања јасно ги најавува своите амбиции за борба за самиот врв.
