Македонската машка ракометна репрезентација ја приведе кон крај подготовката за настапот на Европското првенство, а селекторот Кирил Лазаров го потврди конечниот список од 19 ракометари кои ќе ја претставуваат земјава на континенталниот собир. По базичните подготовки, фокусот сега е ставен на воигрување и тактичка подготвеност преку серија контролни натпревари.
Македонија од 8 до 10 јануари ќе настапи на „Жолтиот куп“ во Швајцарија, каде ќе ги одмери силите со селекциите на Бахреин, Украина и домаќинот Швајцарија, додека на 13 јануари е закажан и последниот тест против данскиот прволигаш Митјиланд. По овие проверки, експедицијата ќе се упати кон Хернинг, каде ќе започне Европското првенство.
На голманската позиција ќе бидат Никола Митревски (Еурофарм Пелистер), Мартин Томовски (Битигхајм, Германија) и Иван Галевски (Алкалоид). Леви крила се Петар Атанасијевиќ (Еурофарм Пелистер) и Иван Џонов (Алкалоид), а пак десни крила Ненад Костески (Алкалоид) и Никола Костески (Алкалоид).
Средни бекови во нашата репрезентација на ЕП ќе бидат Марко Митев (Алкалоид) и Игор Ѓорѓиев (Алкалоид), додека пак леви бекови ќе бидат Филип Кузмановски (Еурофарм Пелистер), Павле Атанасијевиќ (Еурофарм Пелистер) и Дамјан Митев (Алкалоид).
Десни бекови во македонската репрезентација за ЕП ќе бидат Мартин Серафимов (Алкалоид) и Мартин Велковски (Алкалоид), а пак кружни напаѓачи: Жарко Пешевски (Еурофарм Пелистер), Самоил Ристевски (Еурофарм Пелистер), Никола Марковски (Алкалоид), Марко Стојковиќ (Алкалоид) и Михаил Аларов (Алкалоид).
Од поширокиот список поради повреда отпадна Томислав Јагуриновски, додека по одлука на стручниот штаб со репрезентацијата нема да патува ниту Мартин Ивановски.
На Европското првенство Македонија ќе настапи во силна група со Данска, Португалија и Романија. Првиот натпревар е против домаќинот Данска, по што следуваат дуелите со Португалија и Романија, со јасна цел – конкурентен настап и достоинствено претставување на македонскиот ракомет на европската сцена.
