Македонската машка ракометна репрезентација влегува во завршната фаза од подготовките за настапот на Европското првенство, кое од средината на јануари ќе се одржи во Данска, Норвешка и Шведска. По неколкудневната работа во Скопје, „црвено-жолтите“ наскоро ќе заминат во Швајцарија, каде ќе одиграат неколку контролни натпревари што ќе послужат како финална проверка пред шампионатот.
Селекторот Кирил Лазаров истакнува дека е задоволен од досегашниот тек на подготовките, но потенцира дека конечниот список на ракометари сè уште не е затворен. Причина за тоа е здравствената состојба на одредени играчи, како и потребата внимателно да се процени формата на секој поединец. Во договор со Ракометната федерација на Македонија, планирано е на Европското првенство да патуваат 19 ракометари.
„Со оглед на здравствената ситуација кај одредени ракометари, не треба да брзаме со конечниот список на патници на Европското првенство. Треба да почекаме да поминат уште овие два-три дена и потоа ќе се одлучи кои ќе настапат на шампионатот. Уште пред подолго време со федерацијата донесовме одлука за Данска да патуваат деветнаесет ракометари, бројка која што ќе биде доволна. Задоволен сум од досегашниот тек на подготовките, имаме позитивна атмосфера во тимот. Пред настапот на ЕП ќе одиграме три контролни средби кои ќе ни послужат за подигнување на формата, затоа што имаме играчи кои што имаат помала минутажа во своите клубови.“
Лазаров потенцира дека реалноста налага македонската селекција да се потпре на тимската игра и колективниот дух, наместо на индивидуалниот квалитет, кој е поограничен во споредба со останатите учесници на шампионатот.
„Бидејќи Македонија e мала земја, изборот на играчите можеби е најмал од сите селекции кои што ќе играат на ЕП. Треба да створиме добар колектив, добар систем кој што ќе функционира и слабостите квалитетно да ги покриеме. Се обидуваме да направиме добра хемија, да функционираме како тим и да живееме за тие предизвици. Ракометарите се во право кога велат дека е чест, светост и гордост да се носи националниот дрес. И ако така се чувствуваат сигурно дека ќе биде добро. Ние немаме голем број на поединци кои што ќе можат да изнесат еден ваков вид на турнир и треба да функционираме како тим. Бидејќи бевме поканети од Швајцарија да настапиме на овој турнир, не бевме во можност да ги бираме противниците, но сигурен сум дека не чекаат квалитетни тестови пред ЕП“, заврши Лазаров.
Европското првенство ќе се одржи од 15 јануари до 1 февруари, а Македонија ќе го отвори настапот со исклучително тежок предизвик против актуелниот светски шампион Данска. Во групната фаза следуваат уште дуелите со Португалија и Романија, по што ќе биде јасно колку македонската селекција ќе успее да ја капитализира подготвеноста и тимската кохезија што се гради во овој подготвителен период.
